- الجمعة، ١٠ أبريل ٢٠٢٦
- إتصل بنا
متابعة – صفاء مكرم
فاتن رجب إبراهيم ، ام معيلة من محافظة الاقصر ، سوف يتم تكريمها من مبادرة بداية جديدة للتأهيل النفسى للمطلقة وابنائها ودعم المرأة المعيلة باحتفالية يوم المرأة المعيلة للسنة السادسة فى خلال شهر مارس
فاتن رجب إبراهيم ام معيلة من محافظة الاقصر ، تروى لنا قصتها وتقول :
انا اسمي فاتن رجب إبراهيم انا اتجوزت وانا سني 22 سنه وانجبت ثلاث بنات وانا حامل في البنت التالته جوزى راح معايا للدكتورة ولما عملت سونار سأل الدكتوره اللي في بطنها بنت والا ولد قالتله بنت...روحنا البيت ضربني جامد وقالي نزلي اللي في بطنك علشان خلفتك عار وكلها بنات.. وكنت بببكى بحرقة و قولت لأ علشان مغضبش ربنا علشان هقتل روح وده حرام وكنت حامل في ست شهور . راح طلقني غيابي عقاب ليا قبل ما اولدها وتاريخ طلاقي 13/7/2002وبعدها ولدت بنتي 12/10/2002وعشت علي اولادى
واشتغلت ومرضتش اتجوز تاني وارمي بناتي زي ما الناس قالولي ..والضرب اللي كان علي بطني وانا حامل أثر علي بنتي وبعد ما ولدتها اتحجزت بيها في مستشفى أبو الريش شهر وكانت نفسيتي مدمره جدا وكنت خايفه عليها جدا ونسيت اقول حاجه لما ضربني تعبت جدا ونزل عليا دم ورحت مستشفى سيد جلال واتحجزت فيها والحمل بردو منزلش علشان ربنا مبيتعاندش والدكتور سألني مين عمل فيكي كده ..
كدبت عليه وقولت في عقلي ده ابو عيالي مش هأذيه وقولته انا وقعت من علي السلم... قلت كدة علشان بناتي وبيتي ميتخربش ومكنتش اعرف نواياه الخبيثه أنه هيطلقنى غيابى.. وعيشت علي بناتي واشتغلت وحاربت الدنيا علشانهم وفوجئت انه راح اتجوز وبردو خلف بنت من التانيه وطلقها.. بردوا واتجوز التالته وجاب ولدين ولما بناتي كبروا كان نفسهم يشوفوا ابوهم وبعتله البنات عايزين يشوفوك قال معنديش بنات دول ماتو بالنسبالي ..
والبنات ميعرفوش ابوهم شكله ايه لحد وقتنا هذا ..
كنت بقبض معاش من الشئون 400جنيه ومكنش المعاش بيقضينا احنا الاربعه واشتغلت علشان أعلمهم احسن علام وعندي بنتي لم كبرت وفهمت ابوها عايش ومش عايز يشوفهم نفسيتها تعبت وجالها السكر وهي عندها 18سنه.. وهي في أولي جامعة كان عندها السكر من النوع الأول في الدم وديه حاجه دمرتني نفسيا علي بنتي علشان كانت بتدخل العنايه المركزه كتيير وشافت الموت اكتر من مره علشان بتدخل في غيبوبه وكنت ام واب ليهم وكان بيسلط صاحب العماره علينا علشان يطردنا من الشقه بتاعته والله العظيم انا قسيت كتيير انا وبناتي من البشر وكان بسبب ابوهم علشان كنا قاعدين في الشقه اللي اتجوزت فيها بتاعته
ولأنى حاضنة كان جزائى كل يوم نروح القسم علشان صاحب العماره مش عايز ياخد الايجار مني وكان بردو بيسلط مراته عليا تعملي محاضر ضرب علشان اسيب الشقه وربنا كان معايا وكان بينصرني عليهم وكنت بروح المحكمه ببناتي وكنت باخد براءة والحمدلله وده أثر علي بناتي في الحاله النفسيه بتاعتهم ..
[caption id="attachment_24581" align="alignnone" width="300"]
البطلة فاتن رجب إبراهيم ام معيلة من محافظة الاقصر[/caption]
وكنت بروح للدكتور النفسيه علشان بنتي مكانتش بتنام الا بالمهدئات علشان كنا بنروح القسم كتييير بسبب الشقه كانت الحرب كلها علي الشقه وربنا كبير والحمد لله البنت الكبيره استخرجت. معاها شهاده بكالوريوس نظم ومعلومات والتانيه بكالوريوس تجاره واداره اعمال والتالته دبلوم بس علشان اختها كنت بجبلها علاج السكر بيتكلف 3000جنيه شهريا وعندي كل الاورق بتاعت المحاضر محتفظه بيهم واورق علاج السكر بتاع بنتي بردوا معايا وبعد ما اطمنت عليهم في العلام
ربنا افتكرني (بالسرطان) والحمد لله اللي زرعته في بناتي خير هما اللي شالوني في مرضي وكان علاجي غالي جدا والدكاتره بعاتوني فى الاقصر مستشفى شفا الاورمان وسافرت في قطر النوم من رمسيس انا وبنتي لوحدنا ورجعت من غير ماخد علاج من الاقصر علشان العلاج بتاعي غالي جدا 120الف جنيه في الشهر ومش متواجد في المستشفيات لا في القاهرة ولا الاقصر وفي ناس ولاد حلال دلوني علي مشيخه الأزهر والحمد لله جابولي اربع جرعات بس وقالو لي شوفي اي جمعيه تانيه ورحت قدمت في بجمعية معروفة بقالي سنه ونصف ولحد الان مفيش اي رد عليا منهم وقالولي انتي في الإنتظار لم يجي دورك وبقالي سنه مااخدتش علاجي الابديفو وعملت في معهد ناصر مسح ذري والنتيجة طلعت أن الورم الخبيث سارح في جسمي كله حتي العنق فيها ورم والحمد لله على كل حال ولم وقفت العلاج تعبت جدا علشان الورم انتشار في جسمي كله وعملت اشعه مقطعيه بردوا ظهر فيها الورم انتشر في الجسم كله بأحجام كبيره والدكتور لم قلتله مبنامشي من كتر الالم حولني لعياده الألم وكتبلي ترامادول ولزقه علشان انام والحمد لله علي كل حال ..
ورحت المشيخه تاني بناتي ودوني علي كرسي متحرك وكنت خسيت 20كيلو وقولتلهم انا بموت والحمدلله رجعوا صرفولي العلاج من تاني لم شافوا حالتي ومنعت الأكل سنه واتدمرت حرفيا وجالي السكر والضغط بسبب العلاج علشان مكنش فيه علاج وهي ديه حكايتي ورسالتي في الحياه وأحمد الله علي كل شيء علشان بناتي ولاد حلال وهما اللي شالوني في مرضي وربنا يباركلي فيهم يارب
التعليقات الأخيرة