- الجمعة، ١٠ أبريل ٢٠٢٦
- إتصل بنا
متابعة – صفاء مكرم
عزيزة يحيى يوسف ، ام معيلة من محافظة القاهرة ، سوف يتم تكريمها من مبادرة بداية جديدة للتأهيل النفسى للمطلقة وابنائها ودعم المرأة المعيلة باحتفالية يوم المرأة المعيلة للسنة السادسة فى خلال شهر مارس
عزيزة يحيى يوسف ام معيلة من محافظة القاهرة ، تروى لنا قصتها وتقول :
لما حسيت ان في حاجة في صدري وجعاني زي اي ام بيبقي ليه اولويات ومش بتحط في دماغها كلمت ابني الكبير قالي لازم تكشفى فراح مستشفي بهية يحجزلي روحنا في اليوم اللي حددوه وعملوا اللازم من كشف واشاعات واخذ عينة انا كل ده بعمل الاجرات ولا كنت بفكر في اي حاجة غير اني بطمن مش اكتر ... مشينا
وبعد اسبوعين اتصلوا وبلغونا بميعاد تاني ولما روحت كنت انا لوحدي لاني قلت لابني خليك في شغلك لاني قولت لو خير خلاص تمام ولو مش..... يبقي بلاش هو يسمع حاجة مش كويسة المهم انا ربنا الحمدلله كتبلي المحنة دي .
طبعا الدكتور بلغني انى عندي سرطان في الثدي الايمن وممكن يكون راح في حتة نانية لانه هو من النوع الشرس ولازم اخد كيماوي موجه وده حاجة مكلفة علي المستشفي قالولى هما هيدوني الملف بتاعي لاتجه بيه الي معهد الاورام انا بقيت ماشية حاسة اني في كابوس ومش عارفة اطلع منه مش عارفة ايه احساسه بالظبط الوصفه..بقيت اروح هنا وهنا عند دكتور اورام اسال حد ادخل النت روحت بهية تاني قلتلهم اعمل ايه دوخت وبقت دموعي نازلة لوحدها اقول لولادي لا بلاش اقول لزوجي لا اقول لاخواتي لا تعبت اوي في الاخر جمعت ولادي وزوجي قولتهم وسهلت عليهم الامور قولتلهم انا ربنا بعتلي هدية وانا عايزة احافظ عليها وانتم معايا
[caption id="attachment_24574" align="aligncenter" width="300"]
البطلة عزيزة يحيى يوسف ام معيلة من محافظة القاهرة[/caption]
انا لما هموت هموت شهيدة بالمحنة اللي هو كتبهالي انا عايزاكوا تبقوا معايا اقوي زي ماانا معوداكم المهم مشيت في طريقي واتكلت علي الله سبحانه وتعالي، وبدات المشوار والرحلة ورحت المعهد دفعت عشرة جنية ووقفت في الطابور وبدأوا معايا الكشف والاشاعات من الاول ولما روحت بعد ماطلعت التحليل والاشاعات الدكتور قالي بصي ياحجة انتي ملكيش عملية انتي عندك الموضوع شرس وكمان احنا لقينا بؤر في الكبد فااحنا انشاالله هنبدا جلسات كيماوي في التجمع الاول روحت البيت وحصل مشكلة بيني وبين زوجي واتخانقنا وانا ساعتها قولتلوا انت بتتخانق ليه معايا كده ده انا تعبانة ...المهم حسيت انه بيتلكك وفعلا قالي هو انتي مش كنتي عايزة تتطلقي تمام يالا نطلق خدتني كرامتي اوي وحسيت اني متهانة مع تعبى اللى. مكنش قادر يقدره قولتلوا ماشي وفعلا اطلقت قبل اول جلسة كيماوي يعنى كنت نفسيا مش قادرة اوصف ... افوقت واستمديت بقوتي من الله وصلبة امي الله يرحمها وجمدت قلبي .. ورحت لسمسار اعرفه في المنطقة اللي ساكنة فيها وقولتلوا لازم تجيبلي شقة دلوقتي باي ثمن.. انا كان معايا فلوس وديعة شيلاها للزمن وجه وقتها.. فعلا تاني يوم انا روحت فكيت الوديعة وهو لقالي شقة ايجار جديد غاليه شوية بس قلت مش مهم وبسرعة عملت العقد وجبت حد ينظفها
وطلعت قولت لولادى مين هيجي معايا الشقة الجديدةقالولي كلنا ..اخدتهم ونزلنا نشوف الشقة وولادي واصحباهم بدأوا ينزلوا حاجات معينة من الشقة القديمة للشقة الجديدة وبعد مافرشنا الشقة طلعت تاني لطلبقي وقولتلوا انا هسيبلك في الشقة هسيبلك حاجات فيها بس انا طالبه منك طلبين اول حاجة الشقة دي من حقي بس انا مش هاخدها احنا هنسيبها لمحمد ابنى البكرى يتجوز فيها تعويضا عن المرار اللي شافوا معانا وتاني طلب، ياريت متضايقنيش في مصاريف العيال واتقي الله .
طبعا الطلب اللى بخصوص محمد لسه بدري عليه ..ومصاريغ العيال الصغيرة بهدلنى عقبال ماكان بيدينى مصاريفهم .مرة يبعت مرة يقلل كلمت اختي عاشان تيجي معايا فعلا جات معايا اول مرة واخر مرة واخدت الجلسة وكنت حاسة اني مازلت في الكابوس، هو ايه اللي بيحصل الكيماوي شئ مخيف انا ماشوفتش اختي تاني وليا اخوات تانية جم يشوفني بصوا عليا ومشوفتهمش تاني بعد اسوع من الكيماوي ...فوقت شوية روحت اخدت القسيمة بتاعتي علشان ابدا اعمل اجراءات معاش والدي ..طبعا قابلت صعوبات كتير ..بس رحمة ربنا كانت دايما موجودة عملت المعاش اخيرا وكانت ولادى الصغيرين في المرحلة الابتدائية..والكبار كان اللي لسه بيمتحن في الكلية.. والتاني بيدور علي شغل.. قولت لنفسي انتي في اختبار كبير اوي وولادك لسه قدامهم كتير كنت بستمد قوتي من ربنا سبحانه وتعالي وكنت بروح ازور الاطفال اللي عندهم المرض في المعهد واجبلهم سندوتشات وافطر معاهم واعمل كل حاجة في حياتي، عادي جدا ولا كأن عندي اي حاجة كنت باستجهل السرطان.. جه ميعاد الجلسة التانية بعد 21 يوم بدات يوم جديد في حياتي بعين جديدة ومنظور جديد ورحلة اخيرة الفجر صليت ونزلت وقفت في الفرن اجيب عيش وروحت اجيب فطار واسيبهم لولادي .. وكنت عملالهم غدا واخدت فطار ليا وعصير وماية والسبحة والمصحف في شنطتي ولبان وملبس لزوم الرحلة واعتمدت علي الله ..
روحت المعهد وهناك بنسلم الكارت ونقعد نستني الاتوبيس تبع المستشفي المكيف علشان يودينا التجمع.. كنت وانا بركبه كنت بحس كأنى رايحة عمره . كنت بحب اركب ورا كان بيبقي في زعيق وصوت من كل الناس علشان اللي عايز يقعد هنا واللي عايز مرافق يركب جنبها وانا مع نفسي ورا نزلت المعهد اللي في التجمع بدات اتعامل واصحاب كل الناس خليت عندي بدال الاخت مليون اخت واخ .. وكنت بقول لاولادي اني خالتكم معايا .
كنت مشهورة في المعهد اني مش معايا حد فكان اللي في المعهد يقدمولي اي خدمة وربنا كان معايا علي طول وعديت اللي 14 جلسة بالطريقة دي... كان كل مرة اتعلم حاجة جديدة واتعرف علي ناس جديدة واسمع حكايتهم ويسمعوا حكايتي ونضحك ونهرج ونبكي وناكل ونشرب ..ونركب الاتوبيس علشان نرجع تاني على موعد ..كنت بدعم ولادي واقويهم علشان ميضعغوش كنت علي اتصال بوالدهم علشان نفستيهم مع انى كنت بتعب جدا من اسلوبه بس كنت بصل الرحم من وقت لتاني.. كنت بخرج وسافر مع اصحابي الجديدة اللي زبي، اللي حاسين بيا خلصت الكيماوي واخذت الهرموني وفي اشاعة من الاشاعات اللي بتتعمل كل فترة اكتشفوا ان السرطان جااي في الرئة وتحت الابط وقفوا الهرموني وبدات اخد الكيماوي بس اقراص احنا بقي بدات افكر اني ولادي لازم يرتبطوا علشان يبدوا حياة جديدة ويتلخموت في حاجة وانا كمان اكون فرحت بأى حاجة ..
وفعلا محمد ابنى خطب .ووالده مشي من الشقة زي مااتفقت معاه.. ومحمد جالوا شغل حلو في خدمة العملاء في بنك وبدا يوضب شقته ..ومعاذ خلص الكلية ودخل الجيش وولادي الصغيرين بقو في المرحلة الاعدادية سنة2019محمد جالوا كورونا وكنت معاه انا وخطيبته كنا بنروح في عز الشمس المستشفي واكون صاحية من الصبح بعملوا الاكل.. وكنت افرشلوا السرير في المستشفي .. كنت ناسيه خالص اني مريضة مرة انا وخطيبته
مرة ابوه واخوه .. وبفضل الله مافيش حد حصلوا حاجة وهو الحمدلله خف اتجوز بعد ماخف ..وكنت عايزة افرح وافرحهم وبعد كده جبت معاذ واديتوه كل اللي معايا من الوديعة قولتلو ا كمل ياحبيبي وجيب شقة طبعا احنا بنجيب ايجار قديم علي قدنا والحمد لله خطب وفرحت ودخلت الفرحة في قلوبنا كلنا الحمد لله وهو حاليا خلص الجيش وربنا رزقه بشغل في البنك الاهلي خدمة عملاء
وانا لسه باخد الكيماوي، والحمدللله علاقتي كويسة بابوهم علشان خاطر انا فى بنت وولد محتاجين ليه ومعاذ بيكمل تجهيز شقته ادعوله معايا ربنا يوفقه في العفش والفرح ولسه مستمرة الرحلة مع مهند وميار وبفضل الله وحده بقدر اطلع من محنتي، دي لان قدام المحنة في منحة ربنا بيبعتها.. في الرحلة بتاعتي دي انا اتعلمت حاجات كتير بفضل الله انا بقيت اختم القراءن كل شهر عربي وبقيت اهتم باولادي اكتر بقيت احسن بالغير اكتر من الاول بقيت اقوي خليت ضعفي هو قوتي بدال ماافضل احكي سلبيات بقيت اقول ايجابيات وده بينعكس علي حياتي انا اولا.. بقيت حاسة اني اقرب اللي الله انا بشكر كل حد خلا بيا وموقفش جمي بشكر كل حد قسى عليا بشكر كل حد بخل عليا باي حاجة ولو بكلمة طيبة بشكر اللي بكاني.. لانهم دول الناس اللي ساعدوني ابقي قوية انا لغاية الآن الحمدلله بروح المعهد لوحدي ويارب يرزقني بحسن الخاتمة
التعليقات الأخيرة